ಇದು ಶ್ವಾಸಕೋಶಕ್ಕೆ ಸಂಬಂಧಿಸಿದ ಕಾಯಿಲೆ. ಇದರಲ್ಲಿ ಅತಿಯಾದ ಕಫ ಸೃಷ್ಟಿಯಾಗುವಿಕೆ, ತೀವ್ರ ಉಬ್ಬಸ ಮತ್ತು ಕ್ಷೀಣಿಸುತ್ತಾ ಹೋಗುವ ಶ್ವಾಸಕೋಶದ ಶಕ್ತಿ ಪ್ರಮುಖ ಲಕ್ಷಣಗಳು.
ಅಸ್ತಮ ಕಾಯಿಲೆಯು ಮಕ್ಕಳಲ್ಲಿ ಹಾಗೂ ಸಣ್ಣ ವಯಸ್ಸಿನವರಲ್ಲಿ ಕಂಡುಬರುತ್ತದೆ. ಆದರೆ ಸಿಓಪಿಡಿ ಕಾಯಿಲೆಯು 30 ಅಥವಾ 40 ವರ್ಷ ಮೇಲ್ಪಟ್ಟವರಲ್ಲಿ ಕಂಡು ಬರುತ್ತದೆ. ಸರಿಯಾದ ಹಾಗೂ ಸತತವಾದ ಚಿಕಿತ್ಸೆಯಿಂದ ಅಸ್ತಮ ಕಾಯಿಲೆಯಲ್ಲಿ ಶ್ವಾಸಕೋಶದ ಕಳೆದುಕೊಂಡ ಶಕ್ತಿ ಮರಳಿ ಪಡೆಯಲು ಸಾಧ್ಯವಿದೆ. ಆದರೆ ಸಿಓಪಿಡಿ ಕಾಯಿಲೆಯಲ್ಲಿ ಸತತವಾದ ಚಿಕಿತ್ಸೆಯಿಂದ ಉತ್ತಮ ಆಗಬಹುದು ಆದರೆ ಕಳೆದುಕೊಂಡ ಶ್ವಾಸಕೋಶದ ಶಕ್ತಿಯನ್ನು ಸಂಪೂರ್ಣ ಮರಳಿ ಪಡೆಯಲು ಸಾಧ್ಯವಿಲ್ಲ.
ನಮ್ಮ ಉಸಿರಾಟದ ನಾಳಗಳು ಹಿಗ್ಗುವ ಕುಗ್ಗುವ ಶಕ್ತಿಯನ್ನು ಕಳೆದುಕೊಂಡು ಬಿಡುತ್ತವೆ ಮತ್ತು ಕಫ ಸೃಷ್ಟಿ ಮಾಡುವ ಕಾರ್ಖಾನೆಗಳ ರೀತಿ ಕೆಲಸ ಮಾಡುತ್ತವೆ. ಶ್ವಾಸಕೋಶದ ಮೂಲ ರಚನೆ ಕೂಡ ಈ ಕಾಯಿಲೆಯಲ್ಲಿ ಹಾಳಾಗುತ್ತಾ ಹೋಗುತ್ತದೆ.
7) ಸಿಓಪಿಡಿ ಕಾಯಿಲೆಯನ್ನು ಪತ್ತೆ ಹಚ್ಚಲು ಮಾಡುವಂತಹ ಪರೀಕ್ಷೆಗಳು ಯಾವುವು?
ಎಕ್ಸ್ ರೇ ಮತ್ತು ಸಿಟಿ ಸ್ಕ್ಯಾನ್: ಇದರಿಂದ ಶ್ವಾಸಕೋಶದ ಮೂಲ ಆಕಾರದಲ್ಲಿ ಏನಾದರೂ ಹಾಳಾಗಿದ್ದರೆ ಅದು ಕಂಡು ಬರುತ್ತದೆ.
ಲಂಗ್ ಫಂಕ್ಷನ್ ಟೆಸ್ಟ್: ಇದು ಅತ್ಯಂತ ಪ್ರಮುಖ ಪರೀಕ್ಷೆ ಆಗಿದ್ದು ಇದರಲ್ಲಿ ಶ್ವಾಸಕೋಶದ ಶಕ್ತಿಯನ್ನು ಅಳೆಯಲು ಸಾಧ್ಯವಾಗುತ್ತದೆ. ಅದರಲ್ಲೂ ಶ್ವಾಸಕೋಶಗಳ ನಾಳಗಳನ್ನು ಔಷಧಿ ಕೊಟ್ಟು ಕಿರಿದನ್ನು ಹಿರಿದು ಮಾಡಿ ಮತ್ತೆ ಶಕ್ತಿ ಅಳೆಯುವ ವಿಸ್ತೃತ ಪರೀಕ್ಷೆ ತುಂಬಾ ಸಹಾಯಕ.
ರಕ್ತ ಪರೀಕ್ಷೆ: ಇದರಲ್ಲಿ ಸಿಬಿಸಿ, ಸೆಲ್ ಕೌಂಟ್ ಹಾಗೂ ಈಎಸ್ಆರ್ ಪರೀಕ್ಷೆಗಳಿಂದ ಆಗಿರುವಂತಹ ಹಾನಿ ಮತ್ತು ಇನ್ಫೆಕ್ಷನ್ ಪ್ರಮಾಣಗಳನ್ನು ಅಳೆಯಬಹುದಾಗಿದೆ.
8) ಸಿಓಪಿಡಿ ಕಾಯಿಲೆಯಲ್ಲಿ ಕಂಡುಬರುವಂತ ಉಬ್ಬಸದ ವಿಭಿನ್ನ ತೀವ್ರ ಸ್ತರಗಳು ಯಾವುವು?
- ಓಡಿದಾಗ ಬರುವ ಉಬ್ಬಸ.
- ಮೆಟ್ಟಿಲು ಹತ್ತಿದಾಗ ಬರುವ ಉಬ್ಬಸ.
- ಸಮ ಭೂಮಿಯಲ್ಲಿ ನೇರ ನಡೆದಾಗ ಬರುವ ಉಬ್ಬಸ.
- ಒಂದೇ ಕಡೆ ಕುಳಿತಿದ್ದರೂ ಅಥವಾ ಮಲಗಿದ್ದರೂ ಕೂಡ ಕಾಡುವ ಉಬ್ಬಸ.
9) ಸಿಓಪಿಡಿ ಕಾಯಿಲೆ ಒಬ್ಬರಿಂದ ಒಬ್ಬರಿಗೆ ಹರಡುವುದೇ? ಅಥವಾ ಅನುವಂಶಿಕವಾಗಿ ಬರುವುದೇ?
ಈ ಕಾಯಿಲೆಯು ಅಸ್ತಮ ಕಾಯಿಲೆಯ ಹಾಗೆ ಅನುವಂಶಿಕವಾಗಿ ತಂದೆ ತಾಯಿಗಳಿಂದ ಮಕ್ಕಳಿಗೆ ಬರುವುದಿಲ್ಲ. ಈ ಕಾಯಿಲೆಯು ಟಿಬಿ ಕಾಯಿಲೆಯ ಹಾಗೆ ಒಬ್ಬರಿಂದ ಒಬ್ಬರಿಗೆ ಕೆಮ್ಮು ಮತ್ತು ಸೀನಿನಿಂದ ಹರಡುವುದಿಲ್ಲ.
10) ಸಿಓಪಿಡಿ ಕಾಯಿಲೆಯ ರೋಗಿಗಳು ಇನ್ನೂ ಬೇರೆ ಯಾವ ಕಾಯಿಲೆಗಳಿಗೆ ಸುಲಭವಾಗಿ ತುತ್ತಾಗಬಲ್ಲರು?
ಕ್ಷಯ ರೋಗ, ನ್ಯೂಮೋನಿಯಾ, ಕೋವಿಡ್ ತರಹದ ವೈರಸ್ ಕಾಯಿಲೆಗಳು, ಇನ್ಫ್ಲು ಎಂಜಾ, ಸರ್ಪ ಹುಣ್ಣು ಇತ್ಯಾದಿ ಕಾಯಿಲೆಗಳು ಇವರನ್ನು ಸುಲಭವಾಗಿ ಆವರಿಸಿಕೊಳ್ಳಬಹುದು.
ಲೇಖಕರು:
ಡಾ.ಎನ್.ಹೆಚ್.ಕೃಷ್ಣ,
ಚೆಸ್ಟ್ ಕೌನ್ಸಿಲ್ ಆಫ್ ಇಂಡಿಯಾದ (ಸಿಸಿಐ) ಸಂಸ್ಥಾಪಕ ಅಧ್ಯಕ್ಷರು,
ದಾವಣಗೆರೆ.
drkrishna_nh@yahoo.com
