ಹರಿಹರ: ಆಡಳಿತ ನಡೆಸುವ ಸರ್ಕಾರ ಯಾವುದೇ ಪಕ್ಷದಿದ್ದರೂ, ಜನರು ಜಾಗೃತವಾಗಿದ್ದರೆ ಮಾತ್ರ ಜನಪರ ಆಡಳಿತ ಪಡೆಯಲು ಸಾಧ್ಯವೆಂದು ಕರ್ನಾಟಕ ದಲಿತ ಸಂಘರ್ಷ ಸಮಿತಿ (ಪ್ರೊ.ಬಿ.ಕೃಷ್ಣಪ್ಪ ಸ್ಥಾಪಿತ) ತಾಲ್ಲೂಕು ಸಂಚಾಲಕ ಪಿ.ಜೆ.ಮಹಾಂತೇಶ್ ಹೇಳಿದರು.
ಜನ ಸಾಮಾನ್ಯರ ವೇದಿಕೆಯಿಂದ ಬೀದರ್ ನಿಂದ ಬೆಂಗಳೂರಿಗೆ ಹೊರಟ ‘ಯುವ ಪರಿವರ್ತನೆಯಾತ್ರೆ’ ನಗರಕ್ಕೆ ಆಗಮಿಸಿದಾಗ ಸ್ವಾಗತ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.
ಜನರು ಮೈ ಮರೆತರೆ ಸರ್ಕಾರ ಸಹಜವಾಗಿ ಶೋಷಣೆ ಮಾಡುತ್ತದೆ, ಸಂವಿಧಾನ ಮತ್ತು ಕಾನೂನುಗಳ ಅನ್ವಯ ಸರ್ಕಾರ ಆಡಳಿತ ನೀಡುತ್ತಿದೆಯೆಎಂಬುದನ್ನು ಪರೀಕ್ಷೆಗೆ ಒಳಪಡಿಸುವ ಕಾರ್ಯ ಮಾಡುವ ಜನರಿದ್ದರೆ ದುರಾಡಳಿತ ನಡೆಸಲು ಸಾಧ್ಯವಿಲ್ಲ ಎಂದರು.
ದ್ರಾವಿಡ ಕನ್ನಡಿಗರು ಚಳವಳಿಯ ಮುಖಂಡ ಮಂಡ್ಯದ ಅಭಿಗೌಡ ಒಕ್ಕಲಿಗ ಮಾತನಾಡಿ, ವಿವಿಧ ಆಕರ್ಷಣೆಗಳಲ್ಲಿ ತಲ್ಲೀನರಾಗಬೇಕಿದ್ದ ಯುವಕರು 1200 ಕಿ.ಮೀ. ಯಾತ್ರೆ ಹಮ್ಮಿಕೊಂಡು ಜನ ಜಾಗೃತಿ ಮೂಡಿಸುತ್ತಿರುವುದು ಶ್ಲಾಘನೀಯ, ಯುವಕರು ಕ್ರಿಯಾಶೀಲ ಹಾಗೂ ವೈಚಾರಿಕತೆ ಬೆಳೆಸಿಕೊಂಡಲ್ಲಿ ಮಾತ್ರ ಈ ನಾಡಿಗೆ ಉತ್ತಮ ಭವಿಷ್ಯವಿದೆ ಎಂದರು.
ಯಾತ್ರೆಯ ಪ್ರಧಾನ ಸಂಚಾಲಕ ಮುಧೋಳದ ಯಲ್ಲಪ್ಪ ಹೆಗಡೆ ಮಾತನಾಡಿ, ಸರ್ಕಾರಿ ಶಾಲೆಗಳಿಗೆ ಮೂಲಭೂತ ಸೌಕರ್ಯ, ಶಿಕ್ಷಣ ನಮ್ಮ ಹಕ್ಕು-ವ್ಯವಹಾರವಲ್ಲ, ಕೆಪಿಎಸ್‍ಸಿ ಮತ್ತು ನೇಮಕಾತಿ ಪ್ರಾಧಿಕಾರಗಳಿಂದ ಸಕಾಲಿಕ ನೇಮಕಾತಿಕ್ಯಾಲೆಂಡರ್ ಅಳವಡಿಕೆ, ಕೈಗಾರಿಕೆ ನಮ್ಮಲ್ಲಿದ್ದರೆ-ಕೆಲಸವೂ ನಮ್ಮ ಕೈಯಲ್ಲಿ ಎಂದರು.
Read also : ದಾವಣಗೆರೆ: ಸುಪ್ರೀಂ ಪೀಠಕ್ಕೆ ಶೂ ಎಸೆದಿರುವುದು ಖಂಡಿಸಿ ಮನವಿ
ಸರ್ಕಾರಿ ಉದ್ಯೋಗ ಖಾಲಿ ಬೇಡ, ಜಿಲ್ಲೆಗೆ ಮಲ್ಟಿ ಸ್ಪೆಷಾಲಿಟಿ, ತಾಲ್ಲೂಕಿಗೆ ಸುಸಜ್ಜಿತ ಆಸ್ಪತ್ರೆ, ರೈತರಿಗೆ ಉಚಿತ ವಿದ್ಯುತ್, ಕೃಷಿ ಉತ್ಪನ್ನಕ್ಕೆ ಬೆಲೆ ಖಾತ್ರಿ, ರೈತನಿಗೆ ಬೀಜದ ದಾಸೋಹ, ಸಂತ್ರಸ್ಥರಿಗೆ ನ್ಯಾಯ, ಸರಾಗ ಸಾರಿಗೆ ವ್ಯವಸ್ಥೆ, ಮೀಸಲಾತಿ ಹಕ್ಕು, ಸಮಾನತೆಯಂತಹ ಬೇಡಿಕೆಗಳ ಬಗ್ಗೆ ಸರ್ಕಾರದ ಗಮನ ಸೆಳೆಯಲು ಕೈಗೊಂಡ ಈ ಯಾತ್ರೆ ಅ.13 ರಂದು ಬೆಂಗಳೂರಿಗೆ ತಲುಪಲಿದೆ ಎಂದರು.
ಧರ್ಮ, ಜಾತಿ, ಪಕ್ಷದ ಹಂಗು ತೊರೆದುಯುವಕರು, ರೈತರು, ಕಾರ್ಮಿಕರು, ಮಹಿಳೆಯರು ಒಂದಾದರೆ ಯಾವ ಸರ್ಕಾರವುಜನ ವಿರೋಧಿ ಆಡಳಿತ ನಡೆಸಲು ಸಾಧ್ಯವಿಲ್ಲ ಎಂಬುದನ್ನು ಸಾಬೀತು ಪಡಿಸುವ ಅಗತ್ಯವಿದ್ದು ಯಾತ್ರೆ ಮೂಲಕ ಜಾಗೃತಿ ಮೂಡಿಸುವ ಕಾರ್ಯ ನಡೆಸಲಾಗುತ್ತಿದೆ ಎಂದರು.
