ಹರಿಹರ: ಚರಿತ್ರೆಯಲ್ಲಿನ ಸೌಹಾರ್ದ, ಸಾಮರಸ್ಯದ ಭಾಗಗಳನ್ನು ವರ್ತಮಾನಕ್ಕೆ ತಂದುಕೊಂಡು ಹೃದಯಗಳ ನಡುವೆ ಬೆಸುಗೆಯಾಗಿ ರೂಪುಗೊಳ್ಳುವಂತೆ ಮಾಡುವುದು ಎಲ್ಲರ ಜವಾಬ್ದಾರಿಯಾಗಿದೆ ಎಂದು ದಾವಣಗೆರೆ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ಪ್ರಾಚಾರ್ಯ ಡಾ.ದಾದಾಪೀರ್ ನವಿಲೇಹಾಳ್ ಹೇಳಿದರು.
ಮಾನವ ಬಂಧುತ್ವ ವೇದಿಕೆಯಿಂದ ನಗರದ ಹೊರವಲಯದ ಮೈತ್ರಿವನದಲ್ಲಿ ಆಯೋಜಿಸಿದ್ದ ಭಗತ್‌ಸಿಂಗ್, ಸುಖದೇವ್, ರಾಜಗುರು ರವರ ಹುತಾತ್ಮ ದಿನಾಚರಣೆ ಹಾಗೂ ರಾಮಮೋಹನ್ ಲೋಹಿಯಾ ಅವರ ಜನ್ಮದಿನಾಚರಣೆಯಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.
ಮಾನವೀಯ ಸಂಬಂಧ ಹಾಳುಗೆಡವಲು ಚರಿತ್ರೆ ಸಾಧನವಾಗಬಾರದು
ನಮ್ಮ ನಡುವೆ ಜಾತಿವಾದ, ಕೋಮುವಾದ, ಧರ್ಮಾಂಧತೆಯನ್ನು ಬಿತ್ತಿ ಮಾನವೀಯ ಸಂಬಂಧಗಳನ್ನು ಹಾಳುಗೆಡವಲು ಚರಿತ್ರೆ ಸಾಧನವಾಗಬಾರದು ಎಂದರು.
ಕೇವಲ ೨೪ನೇ ವಯಸ್ಸಿನಲ್ಲಿ ನೇಣುಗಂಬ ಏರಿದ ಭಗತ್‌ಸಿಂಗ್ ಮತ್ತು ಸಂಗಡಿಗರು ಸ್ವಾತಂತ್ರ್ಯ ಚಳವಳಿಗೆ ಹೊಸ ಆಯಾಮವನ್ನು ತಂದುಕೊಟ್ಟರು. ಅಸ್ಪೃಶ್ಯತೆ, ಧಾರ್ಮಿಕ ಶ್ರದ್ಧೆ, ಕೋಮುವಾದ, ನಾಸ್ತಿಕವಾದ ಇಂತಹ ಹಲವು ವಿಚಾರಗಳಲ್ಲಿ ಪ್ರಖರವಾದ ತಿಳುವಳಿಕೆ ಇದ್ದು, ಸ್ವಾತಂತ್ರ್ಯ ಭಾರತಕ್ಕೆ ಅಗತ್ಯವಾದ ಚಿಂತನೆ ಮತ್ತು ಹೋರಾಟವನ್ನು ಅವರು ರೂಪಿಸಿಕೊಂಡಿದ್ದರು.
ಓದಿನ ಪ್ರೀತಿ, ಅವರ ಆದರ್ಶಗಳು ಇಂದಿನ ಯುವಕರಿಗೆ ಆದರ್ಶ
ನೇಣುಗಂಬ ಏರುವ ಸಂದರ್ಭದಲ್ಲಿ ಲೆನಿನ್ ಪುಸ್ತಕ ಓದುತ್ತಾ ರೋಸಿ ಹೋಗಿದ್ದರು. ಜೈಲು ಅಧಿಕಾರಿ ನೇಣುಗಂಬಕ್ಕೆ ಕರೆದೊಯ್ಯಲು ಬಂದಾಗ ಲೆನಿನ್ ಪುಸ್ತಕ ಪೂರ್ಣ ಓದಿ ಮುಗಿಸುವವರೆಗೆ ಸಮಯಕೊಡಿ ಎಂದು ಕೇಳಿದ್ದರು. ಇಂತಹ ಓದಿನ ಪ್ರೀತಿ, ಅವರ ಆದರ್ಶಗಳು ಇಂದಿನ ಯುವಕರಿಗೆ ಆದರ್ಶವಾಗಬೇಕೆಂದರು.
ಬಂಧುತ್ವಗಳಿಗೆ ಇಂದು ನಂಜು ಸವರಲಾಗುತ್ತಿದೆ
ಮಾನವ ಬಂಧುತ್ವ ವೇದಿಕೆ ರಾಜ್ಯಾಧ್ಯಕ್ಷ ಡಾ.ಎ.ಬಿ.ರಾಮಚಂದ್ರಪ್ಪ ಮಾತನಾಡಿ, ಮಾನವ ಬಂಧುತ್ವದ ಮೌಲ್ಯಗಳು ಚರಿತ್ರೆಯಲ್ಲಿ ಅಪಾರವಾಗಿ ಕಾಣಸಿಗುತ್ತವೆ, ಈ ಬಂಧುತ್ವಗಳಿಗೆ ಇಂದು ನಂಜು ಸವರಲಾಗುತ್ತಿದೆ. ರಾಮಮನೋಹರ ಲೋಹಿಯಾ ಪ್ರತಿಪಕ್ಷದಲ್ಲಿದ್ದುಕೊಂಡು ಆಡಳಿತ ಪಕ್ಷದ ಮಿತಿಗಳನ್ನು ಎತ್ತಿ ತೋರಿಸಿ ಆಡಳಿತವನ್ನು ಮಾನವೀಯಗೊಳಿಸುತ್ತಿದ್ದರು. ಆಡಳಿತ ಪಕ್ಷದಷ್ಟೆ ಮುಖ್ಯವಾಗಿ ಪ್ರತಿಪಕ್ಷ ಇದ್ದಾಗ ಮಾತ್ರ ಪ್ರಜಾಪ್ರಭುತ್ವ ಯಶಸ್ವಿಯಾಗಬಲ್ಲದು ಎಂದರು.
ವೇದಿಕೆಯಲ್ಲಿ ಮಾನವ ಬಂಧುತ್ವ ವೇದಿಕೆ ಜಿಲ್ಲಾ ಸಂಚಾಲಕ ಮಾಡಾಳ್ ಶಿವಕುಮಾರ್, ಮಹಿಳಾ ಘಟಕದ ಜಿಲ್ಲಾ ಸಂಚಾಲಕಿ ಪವಿತ್ರಾ, ತಾಲ್ಲೂಕು ಸಮಚಾಲಕರಾದ ಮಂಜುನಾಥ ಉಕ್ಕಡಗಾತ್ರಿ, ಜಗಳೂರಿನ ವಕೀಲ ಬಸವರಾಜ್, ಹೊನ್ನಾಳಿಯ ಗಣೇಶ್, ದಾವಣಗೆರೆಯ ಹನುಂಮತಪ್ಪ ಕರೂರು, ಚನ್ನಗಿರಿಯ ಸತೀಸ್ ಕಾಕನೂರು ಹಾಗೂ ಇತರರಿದ್ದರು.
