ಹರಿಹರ (Harihara): ಜಮೀನುಗಳಲ್ಲಿನ ಮಣ್ಣು ಗಣಿಗಾರಿಕೆಯಿಂದ ವಿದ್ಯುತ್ ಪ್ರಸಾರದ ಟವರ್‍ಗಳು ಉರುಳಿ ಬಿದ್ದು ಜನ, ಜಾನವಾರುಗಳ ಪ್ರಾಣಕ್ಕೆ ಆಸ್ತಿ, ಪಾಸ್ತಿಗಳಿಗೆ ಹಾನಿಯಾದರೆ ಸಂಬಂಧಿತ ಅಧಿಕಾರಿಗಳನ್ನೆ ಹೊಣೆಗಾರರನ್ನಾಗಿ ಮಾಡಬೇಕೆಂದು ಕರ್ನಾಟಕ ದಲಿತ ಸಂಘರ್ಷ ಸಮಿತಿ (ಪ್ರೊ.ಬಿ.ಕೃಷ್ಣಪ್ಪ ಸ್ಥಾಪಿತ) ತಾಲ್ಲೂಕು ಸಂಚಾಲಕ ಪಿ.ಜೆ.ಮಹಾಂತೇಶ್ ಆಗ್ರಹಿಸಿದ್ದಾರೆ.
ಕೃಷಿ ಕಾರ್ಯಕ್ಕೆ ಅನುಕೂಲವಾಗಲೆಂದು ಜಮೀನುಗಳ ಸಮತಟ್ಟ ಮಾಡಲು ಗಣಿ ಮತ್ತು ಭೂ ವಿಜ್ಞಾನ, ಕಂದಾಯ ಮತ್ತು ಕೃಷಿ ಇಲಾಖೆಯವರು ಅನುಮತಿ ನೀಡುತ್ತಾರೆ. ಅಂತಹ ಅನುಮತಿ ಪಡೆದವರು 10 ರಿಂದ 15 ಅಡಿ ಆಳದವರೆಗೆ ಜಮೀನುಗಳನ್ನು ಅಗೆದು ರೂ.10 ಸಾವಿರಕ್ಕೊಂದು ಲಾರಿ ಲೋಡಿನಂತೆ ಮಣ್ಣನ್ನು ಮಾರಾಟ ಮಾಡಿಕೊಳ್ಳುತ್ತಿದ್ದಾರೆಂದು ಪತ್ರಿಕಾ ಹೇಳಿಕೆಯಲ್ಲಿ ಆರೋಪಿಸಿದ್ದಾರೆ.
4000 ವೋಲ್ಟೇಜ್ ಪ್ರಮಾಣದ ವಿದ್ಯುತ್ ಪ್ರವಾಹ ಇರುವ ಟವರ್ ಗಳು ನೆಲಕ್ಕುರುಳಿದರೆ ಊಹಿಸಲಾಗದಷ್ಟು ಹಾನಿಯಾಗುವ ಸಾಧ್ಯತೆ ಇರುತ್ತದೆ. ಟವರ್‍ಗಳ ಅಕ್ಕಪಕ್ಕದಲ್ಲೆ ಮಣ್ಣು ಅಗೆಯುವುದನ್ನು ತಡೆಯುವಲ್ಲಿ ಕೆಪಿಟಿಸಿಎಲ್ ಸೇರಿದಂತೆ ಜಮೀನು ಸಮತಟ್ಟ ಮಾಡಲು ಅನುಮತಿ ನೀಡುವ ಅಧಿಕಾರಿ ವಿಫಲರಾಗಿರುವುದು ರುಜುವಾತು ಆಗಿದೆ ಎಂದು ತಿಳಿಸಿದ್ದಾರೆ.
ಕೆಪಿಟಿಸಿಎಲ್ ಅಧಿಕಾರಿಗಳ ಭೇಟಿ: ಮಾಧ್ಯಮಗಳಲ್ಲಿ ಪ್ರಕಟವಾದ ಸುದ್ದಿ ಗಮನಿಸಿ ಗುರುವಾರದಂದು ಕೆಪಿಟಿಸಿಎಲ್‍ನ ಟಿಎಲ್‍ಎಂ (ಪ್ರಸರಣ ಮಾರ್ಗ ನಿರ್ವಹಣೆ ಶಾಖೆ) ಎಇಇ ರೂಪ ಹಾಗೂ ಇತರೆ ಸಿಬ್ಬಂದಿ ತಾಲ್ಲೂಕಿನ ಗುತ್ತೂರು ಗ್ರಾಮದ ಸರ್ವೆ ನಂ.156/6 ನ ಜಮೀನಿನಲ್ಲಿರುವ ಟವರ್ ಭದ್ರತೆಯನ್ನು ಪರಿಶೀಲಿಸಿದರು.
ಮಣ್ಣು ಅಗೆದಿರುವುದರಿಂದ ಟವರ್ ಭದ್ರತೆಗೆ ಎದುರಾಗಿರುವ ಅಪಾಯವನ್ನು ವಿವರಿಸಿ, ಆ ಭಾಗದಲ್ಲಿ ಮಣ್ಣು ಅಗೆಯುವುದನ್ನು ತಡೆಗಟ್ಟಲು ಸೂಕ್ತ ಗಮನಹರಿಸಬೇಕೆಂದು ಜಿಲ್ಲಾಧಿಕಾರಿ, ಉಪ ವಿಭಾಗಾಧಿಕಾರಿ ಹಾಗೂ ತಹಶೀಲ್ದಾರರಿಗೆ ಶುಕ್ರವಾರ ಪತ್ರ ರವಾನಿಸಲಾಗಿದೆ ಎಂದು ಕೆಪಿಟಿಸಿಎಲ್‍ನ ಎಇಇ ರೂಪ ತಿಳಿಸಿದ್ದಾರೆ.
Read also : ಶಾಲಾ ಸಬಲೀಕರಣ ಸಮಿತಿಯ ವರದಿ ಯಥಾವತ್ತಾಗಿ ಜಾರಿಗೆ ಪ್ರಜಾ ಪರಿವರ್ತನಾ ವೇದಿಕೆ ಒತ್ತಾಯ
