ದಾವಣಗೆರೆ: ದಾವಣಗೆರೆಯಲ್ಲಿ ಶರನ್ನವರಾತ್ರಿ ಸಡಗರ, ಸಂಭ್ರಮ ಮನೆ ಮಾಡಿದೆ. ಗಲ್ಲಿ ಗಲ್ಲಿ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ಬನ್ನಿ ಮರದ ಕೆಳಗೆ ಪ್ರತಿಷ್ಠಾಪಿಸಿರುವ ಶ್ರೀ ಬನ್ನಿ ಮಹಾಂಕಾಳಿಗೆ ನಿತ್ಯವೂ ಪೂಜೆ ನೆರವೇರಿಸಲಾಗುತ್ತಿದೆ. ಶರನ್ನವರಾತ್ರಿ ಹಿನ್ನೆಲೆಯಲ್ಲಿ ಕಳೆದ ಒಂಬತ್ತು ದಿನಗಳಿಂದ ವ್ರತ ಆಚರಿಸುತ್ತಿರುವ ಮಹಿಳೆಯರು ಬೆಳ್ಳಂಬೆಳಗ್ಗೆ ಬನ್ನಿ ಮರಕ್ಕೆ ತೆರಳಿ ಮೌನ ವ್ರತಾಚರಣೆ ಮೂಲಕ ಪೂಜಾ ಕೈಂಕರ್ಯ ನೆರವೇರಿಸಿ, ದೇವಿಯ ಸ್ತುತಿ ಸ್ತೋತ್ರಗಳನ್ನು ಪಠಿಸುತ್ತಾ ಬನ್ನಿ ಮರಕ್ಕೆ ಐದು ಸುತ್ತು ಪ್ರದಕ್ಷಿಣೆ ಹಾಕಿ, ಬನ್ನಿ ಮಹಾಕಾಳಿ ದೇವತೆಗೆ ನಮಸ್ಕರಿಸುತ್ತಾರೆ. ದೇವಿಗೆ ನೈವೇದ್ಯ ಸಮರ್ಪಣೆ ಮಾಡುತ್ತಾರೆ.
ಮಾತ್ರವಲ್ಲ, ದುರ್ಗಾ ಮಾತೆಯ ಆಯಾ ದಿನದ ಅವತಾರದ ಬಣ್ಣದ ಸೀರೆಯನ್ನು ಬನ್ನಿ ಮಹಾಂಕಾಳಿಗೆ ಉಡುಸಿ, ನಾನಾ ಬಗೆಯ ಹೂವುಗಳಿಂದ ಅಲಂಕರಿಸಿ ಪೂಜಿಸುವ ಗಂಟೆಯ ನಾದ, ಪ್ರತಿದಿನ ಬೆಳಗ್ಗೆ 4 ಗಂಟೆಯಿಂದ ಕೇಳಲಾರಂಭಿಸುತ್ತಿದೆ. ಬನ್ನಿ ಮಹಾಂಕಾಳಿಗೆ ಪೂಜೆ ಸಲ್ಲಿಸಿದ ಬಳಿಕ ಮಹಿಳೆಯರು ಮಕ್ಕಳೊಂದಿಗೆ ದುರ್ಗಾಂಬಿಕೆ, ನಿಟ್ಟುವಳ್ಳಿ ದುರ್ಗಮ್ಮ, ಸ್ಮಶಾನ ಚೌಡಮ್ಮ, ವಿನೋಬನಗರ ಚೌಡಮ್ಮ ಸೇರಿ ನಗರದಲ್ಲಿರುವ ನಾನಾ ಶಕ್ತಿ ದೇವತೆಗಳ ದೇವಸ್ಥಾನಗಳಿಗೆ ತೆರಳಿ, ವಿಶೇಷ ಪೂಜೆ, ಅಭಿಷೇಕ ಮಾಡಿಸಿ, ಮಂಗಳಾರತಿ, ತೀರ್ಥ ಸ್ವೀಕರಿಸಿ ಇಷ್ಟಾರ್ಥ ಸಿದ್ದಿಗಾಗಿ ನವದುರ್ಗೆಯರಲ್ಲಿ ಪ್ರಾರ್ಥಿಸುತ್ತಿದ್ದಾರೆ.
ವ್ರತ ಗುರುವಾರಕ್ಕೆ ಅಂತ್ಯ :
ಈ ಬಾರಿ ನವರಾತ್ರಿಯು 9 ದಿನಗಳ ಬದಲು 10 ದಿನಗಳ ಕಾಲ ಬಂದಿರುವುದರಿಂದ ವ್ರತ ಆಚರಣೆಯಲ್ಲಿ ತೊಡಗಿರುವ ಮಹಿಳೆಯರು 9ನೇ ದಿನವಾದ ಮಂಗಳವಾರ ವ್ರತ ಮುಗಿಸಬೇಕೋ ಅಥವಾ ಆಯುಧ ಪೂಜೆ ನಡೆಯುವ ಬುಧವಾರ ಅಂತ್ಯಗೊಳಿಸಬೇಕೋ ಎಂಬ ಗೊಂದಲದಲ್ಲಿ ಗುರುವಾರ ಅಂತ್ಯಗೊಳಿಸಲಿದ್ದಾರೆ.
ಈ ಗೊಂದಲ ನಿವಾರಣೆಗೆ ಮಹಿಳೆಯರು ದೇವಸ್ಥಾನಗಳ ಅರ್ಚಕರು ಅಥವಾ ಜ್ಯೋತಿಷಿಗಳ ಮೊರೆ ಹೋಗುತ್ತಿದ್ದಾರೆ. ಅವರ ಸಲಹೆ ಮೇರೆಗೆ ಕೆಲ ಮಹಿಳೆಯರು ಮಂಗಳವಾರ, ಬುಧವಾರ ವ್ರತ ಸಮಾಪ್ತಿಗೊಳಿಸಲು ಮುಂದಾಗಿದ್ದರೆ, ಇನ್ನು ಕೆಲವರು ಗುರುವಾರ ಅಂತಿಮ ಪೂಜೆ ಸಲ್ಲಿಸಲು ಸಿದ್ಧತೆ ನಡೆಸಿದ್ದಾರೆ.
ಆಯುಧ, ದುರ್ಗಾ ಪೂಜೆ :
ದಾವಣಗೆರೆಯ ವಸಂತ ಚಿತ್ರಮಂದಿರ ರಸ್ತೆಯಲ್ಲಿ ಬೆಂಗಾಲ್ ದುರ್ಗಾಮಾತಾ ಅಸೋಸಿಯೇಷನ್ ವತಿಯಿಂದ ಪಶ್ಚಿಮ ಬಂಗಾಳ ಮಾದರಿಯಲ್ಲಿ ಸೆ.29ರಿಂದ ಅಕ್ಟೋಬರ್ 3ರ ವರೆಗೆ ಸಾರ್ವಜನಿಕ ದುರ್ಗಾಮಾತಾ ಪೂಜಾ ನಡೆಸಲಾಗುತ್ತಿದೆ. ಸೆ.29ರ ಸೋಮವಾರ ಮಹಾಸಪ್ತಮಿ ಆಚರಿಸಲಾಗಿದೆ.
ಸೆ.30ರ ಮಂಗಳವಾರ ಮಹಾ ಅಷ್ಠಮಿ, ಅಕ್ಟೋಬರ್ 1ರ ಬುಧವಾರ ಮಧ್ಯಾಹ್ನ 1 ಗಂಟೆಗೆ ಮಹಾನದಮಿ, 2ರ ಗುರುವಾರ ಅನ್ನಕೂಟ ಮತ್ತು ದಶಮಿ ಆಚರಿಸಲಾಗುವುದು. 3ರ ಶುಕ್ರವಾರ ಮಧ್ಯಾಹ್ನ 1.30ಕ್ಕೆ ದುರ್ಗಾಮಾತೆಯ ಪ್ರತಿಮೆ ವಿಸರ್ಜನೆ ನಡೆಯಲಿದೆ.
ಪೂಜೆಗೂ ದಿನಗಣನೆ ಆರಂಭವಾಗಿದೆ
ಈ ಹಿನ್ನೆಲೆಯಲ್ಲಿ ಕಟ್ಟಡ ಕಾರ್ಮಿಕರು ತಮ್ಮ ದುಡಿಮೆಗೆ ಆಧಾರವಾಗಿರುವ ಕರಣಿ, ಮೂಲಿಮಟ್ಟ, ತೂಗೋ ಗುಂಡು, ಪುಟ್ಟಿ, ಕಾರ್ಪೆಂಟರ್‌ಗಳು (ಬಡಗಿ) ಉಳಿ, ಸುತ್ತಿಗೆ, ಉದಕೋಲ್ಟು, ಕುಲೆಮೆ ಕಾಸುವ ಕಮ್ಮಾರರು ಚಾಣ, ಸುತ್ತಿಗೆ ಸೇರಿ ಇತರೆ ಸಲಕರಣೆಗಳ ಹುಡುಕಾಟದಲ್ಲಿ ತೊಡಗಿದ್ದಾರೆ. ಗುರುವಾರ ನಡೆಯುವ ಬೃಹತ್ ಶೋಭಾಯಾತ್ರೆಗೆ ಸಿದ್ಧತೆ ನಡೆಸಿದ್ದಾರೆ.
ಶೋಭಾಯಾತ್ರೆ: ಸಿಸಿಟಿವಿ ಕ್ಯಾಮೆರಾ ಕಣ್ಗಾವಲು…
ವಿಜಯದಶಮಿ ಹಿನ್ನೆಲೆಯಲ್ಲಿ ಅ.2ರಂದು ವಿಶ್ವ ಹಿಂದೂ ಪರಿಷತ್ತು, ಸಾರ್ವಜನಿಕ ವಿಜಯದಶಮಿ ಮಹೋತ್ಸವ ಸಮಿತಿ ವತಿಯಿಂದ ಆಯೋಜಿಸಿರುವ ಶೋಭಾಯಾತ್ರೆ ಮೇಲೆ ಪೊಲೀಸರು ಕಣ್ಗಾವಲು ಇಟ್ಟಿದ್ದು, 200 ಸಿಸಿಟಿವಿ ಕ್ಯಾಮೆರಾಗಳ ನಿಗಾ ಇಡಲಾಗಿದೆ. ನಗರದ ವೆಂಕಟೇಶ್ವರ ವೃತ್ತದಿಂದ ವಿಜಯದಶಮಿ ಮೆರವಣಿಗೆ ಆರಂಭವಾಗಲಿದೆ.
ಕಾನೂನು ಸುವ್ಯವಸ್ಥೆ ಕಾಪಾಡುವ ನಿಟ್ಟಿನಲ್ಲಿ ಹೆಚ್ಚಿನ ಪೋಲಿಸ್ ಸಿಬ್ಬಂದಿ ನಿಯೋಜಿಸಲಾಗಿದೆ. ಕೆಎಸ್ ಆರ್ ಪಿ ಮತ್ತು ಡಿಎಆರ್ ತುಕಡಿಗಳು, ಕ್ಷಿಪ್ರ ಕಾರ್ಯಪಡೆ, ದುರ್ಗಾಪಡೆ, ಗೃಹ ರಕ್ಷಕ ದಳದ ಸಿಬ್ಬಂದಿಗಳು ಕಾರ್ಯನಿರ್ವಹಿಸಲಿದ್ದಾರೆ. ಜೊತೆಗೆ ಡ್ರೋಣ್ ಕ್ಯಾಮೆರಾಗಳು ಶೋಭಾಯಾತ್ರೆಯುದ್ದಕ್ಜೂ ಪಹರೆ ನಡೆಸಲಿದೆ ಎಂದು ಎಸ್ಪಿ ಉಮಾ ಪ್ರಶಾಂತ್ ತಿಳಿಸಿದ್ದಾರೆ.
ನಿಗದಿಪಡಿಸಿದ ಮಾರ್ಗಗಗಳಲ್ಲಿ ಮೆರವಣಿಗೆಗೆ ಅವಕಾಶ ನೀಡಲಾಗಿದ್ದು, ಮಾರ್ಗ ಬದಲಾವಣೆಗೆ ಯಾವುದೇ ಕಾರಣಕ್ಕೂ ಅವಕಾಶ ನೀಡುವುದಿಲ್ಲ. ಮೆರವಣಿಗೆಯಲ್ಲಿ ಪ್ರಚೋದನಕಾರಿ ಹಾಡುಗಳನ್ನು ಹಾಕುವಂತಿಲ್ಲ. ಭಿತ್ತಿಚಿತ್ರಗಳನ್ನು ಪ್ರದರ್ಶನ ಮಾಡುವಂತಿಲ್ಲ. ಜನಸಂದಣಿ ಇರುವ ಪ್ರದೇಶಗಳಲ್ಲಿ ಪಟಾಕಿ ಸಿಡಿಸುವಂತಿಲ್ಲ.-ಉಮಾ ಪ್ರಶಾಂತ್, ಎಸ್ಪಿ, ದಾವಣಗೆರೆ.
