ದಾವಣಗೆರೆ : ಭಾರತದ ಇತಿಹಾಸವನ್ನು ಇಂದಿನ ಯುವಪೀಳಿಗೆ ಅಧ್ಯಯನ ಮಾಡುವ ಮೂಲಕ ನೆಮ್ಮದಿ ನೀಡದ ಕೃತಕ ಜೀವನದಿಂದ ಹೊರಬಂದು ಜೀವನದ ಬಗ್ಗೆ ಪುನರಾಲೋಚಿಸುವಂತೆ ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶರಾದ ಡಿ.ಕೆ.ವೇಲಾ ಕರೆ ನೀಡಿದರು.
ನಗರದ ವಕೀಲರ ಸಾಂಸ್ಕøತಿಕ ಸಮುದಾಯ ಭವನದಲ್ಲಿ ಜಿಲ್ಲಾ ವಕೀಲರ ಸಂಘ ಆಯೋಜಿಸಿದ್ದ 79ನೇ ಸ್ವಾತಂತ್ರ್ಯ ದಿನಾಚರಣೆ, ಹೆಚ್.ಸಿದ್ದವೀರಪ್ಪ ಭಾವಚಿತ್ರ ಅನಾವರಣ, ಪ್ರತಿಭಾ ಪುರಸ್ಕಾರ, ವಕೀಲರ ನೂತನ ಡೈರಕ್ಟರಿಯನ್ನು ಬಿಡುಗಡೆ ಮಾಡಿ, ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡು ಮಾತನಾಡಿದರು.
ಸಂವಿಧಾನವನ್ನು ರಚಿಸುವ ಸಂದರ್ಭದಲ್ಲಿ ಸಭೆಯಲ್ಲಿದ್ದ ಗಣ್ಯಮಾನ್ಯ ಸದಸ್ಯರು ಪ್ರತಿಪದವನ್ನು ಅತ್ಯಂತ ಜಾಗರೂಕತೆ, ವಿವೇಚನೆಯಿಂದ ಬಳಸಿ ಸಂವಿಧಾನ ರಚಿಸಿದ್ದಾರೆ. ಜೀವಿಸುವ ಹಕ್ಕು, ಶುದ್ದ ಗಾಳಿ, ಒಳ್ಳೆಯ ಕುಡಿಯುವ ನೀರು, ನಿರ್ಮಲ ವಾತಾವರಣವನ್ನು ಸಹ ಒಳಗೊಳ್ಳುತ್ತದೆ ಎಂದು ಸುಪ್ರೀಂಕೋರ್ಟಿನ ಅರ್ಥವಿವರಣೆಯನ್ನು ನೀಡಿದೆ. ಆ ಮೂಲಕ ಈ ಹಕ್ಕಿನ ವ್ಯಾಪ್ತಿಯನ್ನು ವಿವರಿಸಿದರು.
ಮಕ್ಕಳ ಸ್ನೇಹಿ ನ್ಯಾಯಾಲಯದ ಜಿಲ್ಲಾ ನ್ಯಾಯಾಧೀಶರಾದ ಶ್ರೀರಾಮ ನಾರಾಯಣ ಹೆಗಡೆ ಮಾತನಾಡಿ,ಆರಂಭದಿಂದಲೂ ದೇಶದ ಬಗ್ಗೆ ಚಿಂತನೆ ಮಾಡಿದವರು ವಕೀಲರೇ, ಆದ್ದರಿಂದಲೇ ವಕೀಲರು ನಮ್ಮ ದೇಶದ ಸ್ವಾತಂತ್ರ್ಯ ಚಳುವಳಿಯಲ್ಲಿ ಮುಂಚೂಣಿ ಯಲ್ಲಿದ್ದರು. ಆದರೆ, ಸ್ವಾರ್ಥಿಗಳಿಂದ ಇಂದು ರಾಷ್ಟ್ರದ ಪ್ರಗತಿಗೆ ಅಡ್ಡಿ ಆಗುತ್ತಿದ್ದು, ರಾಷ್ಟ್ರದ ರಾಜಕೀಯ ಪ್ರಧಾನ ಭೂಮಿಕೆಯಲ್ಲಿ ವಕೀಲರು ಮತ್ತೆ ಮುಂದೆ ಬರಬೇಕಾಗಿದೆ ಎಂದು ಕರೆ ನೀಡಿದರು.
ಪ್ರಾಸ್ತಾವಿಕವಾಗಿ ಮಾತನಾಡಿದ ಜಿಲ್ಲಾ ವಕೀಲರ ಸಂಘದ ಅಧ್ಯಕ್ಷ ಎಲ್.ಹೆಚ್.ಅರುಣ್‍ಕುಮಾರ್, ಭಾರತದ ಸಂವಿಧಾನ ರಚನಾ ಸಭೆಯಲ್ಲಿ ಒಟ್ಟು 99 ಜನ ವಕೀಲರಿದ್ದರು. ಅವರಲ್ಲಿ ನಮ್ಮ ವಕೀಲರ ಸಂಘದ ಸದಸ್ಯರಾಗಿದ್ದ ಹೆಚ್.ಸಿದ್ದವೀರಪ್ಪ ಸಹ ಒಬ್ಬರು ಎನ್ನುವುದು ಹೆಗ್ಗಳಿಕೆಯ ಸಂಗತಿ. ಸಿದ್ದವೀರಪ್ಪನವರು ಸರ್ವ ಜನರ ಪ್ರೀತಿಗೆ ಪಾತ್ರರಾಗಿದ್ದರು. ಕರ್ನಾಟಕ ಸರ್ಕಾರದಲ್ಲಿ ಗೃಹಖಾತೆ ಸೇರಿದಂತೆ ಹಲವಾರು ಮಹತ್ತರ ಖಾತೆಗಳನ್ನು ನಿರ್ವಹಿಸಿ, ಕಾನೂನು ಸಚಿವರಾದ ಸಂದರ್ಭದಲ್ಲಿ ಹಲವು ಮಹತ್ವದ ಮಸೂದೆಗಳನ್ನು ಮಂಡಿಸಿ ಶಾಸನಗಳನ್ನಾಗಿ ಮಾಡಿರುವುದು ಇತಿಹಾಸದ ಅವಲೋಕನ ಎಂದು ಸ್ಮರಿಸಿದರು.
Read also : ಸನ್ ರೈಸ್ ಪ್ರಿ ಸ್ಕೂಲ್ ನಲ್ಲಿ ಮಕ್ಕಳಿಂದ ಕೃಷ್ಣ ಜನ್ಮಾಷ್ಠಮಿ
ಕಾರ್ಯಕ್ರಮದಲ್ಲಿ ವಕೀಲರಾದ ಕೆ.ಎಂ.ಮಲ್ಲಿಕಾರ್ಜುನ್, ಕೆ.ಹೆಚ್.ಮಂಜಪ್ಪ, ಎನ್.ಎಂ.ಆಂಜನೇಯ, ಬಿ.ಎಂ.ಹನುಮಂತಪ್ಪ, ವಿನಯ್‍ಕುಮಾರ್, ರಜ್ವಿಖಾನ್ ಮಾತನಾಡಿದರು.
ಈ ವೇಳೆ ವಕೀಲರಾದ ಕೆ.ಎಂ.ಜಯಪ್ರಕಾಶ್ ಅವರು, ಹೆಚ್.ಸಿದ್ದವೀರಪ್ಪನವರು ಸಂವಿಧಾನ ಸಭೆಯಲ್ಲಿ ಜಮೀನ್ದಾರಿ ಪದ್ದತಿ ರದ್ದತಿ ಬಗ್ಗೆ ತಿದ್ದುಪಡಿ ಮಂಡಿಸಿ ಮಾಡಿದ ಭಾಷಣ ವಾಚಿಸಿದರು. ಇದೇ ಸಂದರ್ಭದಲ್ಲಿ ಎಸ್‍ಎಸ್‍ಎಲ್‍ಸಿ ಮತ್ತು ಪಿಯುಸಿ ಪರೀಕ್ಷೆಗಳಲ್ಲಿ ಹೆಚ್ಚಿನ ಅಂಕಗಳನ್ನು ಗಳಿಸಿದ ವಕೀಲರ ಮಕ್ಕಳಿಗೆ ಪ್ರತಿಭಾ ಪುರಸ್ಕಾರ ನೀಡಲಾಯಿತು.
ಕೌಟುಂಬಿಕ ನ್ಯಾಯಾಲಯದ ನ್ಯಾಯಾಧೀಶರಾದ ಶಿವಪ್ಪ ಗಂಗಪ್ಪ ಸಲಗರೆ, ಪ್ರಧಾನ ಹಿರಿಯ ಸಿವಿಲ್ ನ್ಯಾಯಾಧೀಶರು, ಸಿಜೆಎಂ ಆದ ಹೆಚ್.ಕೆ.ರೇಷ್ಮಾ, ಜಿಲ್ಲಾ ಕಾನೂನು ಸೇವಾ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ ಮಹಾವೀರ ಮ.ಕರೆಣ್ಣವರ, ಜಿಲ್ಲಾ ವಕೀಲರ ಸಂಘದ ಉಪಾಧ್ಯಕ್ಷ ಜಿ.ಕೆ.ಬಸವರಾಜ್ ಗೋಪನಾಳು, ಕಾರ್ಯದರ್ಶಿ ಎಸ್.ಬಸವರಾಜ್, ಸಹಕಾರ್ಯದರ್ಶಿ ಎ.ಎಸ್.ಮಂಜುನಾಥ್ ವೇದಿಕೆಯಲ್ಲಿ ಇದ್ದರು.
